Oporretan ere zabalik

Oporretan ere zabalik egongo dela gure txoko hau, alegia.

Zertarako? Lehenik eta behin euskaltegian izerdi patsetan udako ikastaro trinkoan lanean ari diren bi taldeek erabiltzeko... eta gero, oporretan zabiltzatenok ere sartu-irten bat egiteko. Udan denerako izaten da denbora gehiago: leku berriak ezagutzeko (eta lagunei gomendatzeko), beti gustatu izan zaizkigun txokoetara bueltatzeko, bateko eta besteko jaietan ibiltzeko (eta zer giro topatu dugun esateko), irakurtzeko, eta musikaren erritmoan dantzan ibiltzekoooooooo.

Horixe ba kontua, zertan zabiltzaten esatea. Eta nahi izanez gero, argazkitxoren bat ere bidaltzea. Ea zeinek ematen duen lehen urratsa eta zabaltzen duen erantzunen tartea.

Urederra iruditan

Urbasara aurrena, Urederrako basoan zehar putzuetaraino gero, Bakedanon atseden hartu, eta azkenik, Irantzungo monastegiraino. Egun ederra atzokoa txangoan parte hartu zuten mintzalagun eta gainerakoentzat.

Bizkaia aldera bai, baina nora?

Ekainaren 14an egun osoko txangoa izango dugu. Horrela emango diogu amaiera 08/09ko ekintza osagarrien egutegiari. Euskaltegiko mintzalagunen taldea dabil egun pasa hori antolatzen, eta honezkero denok jakingo duzue Nerbioi ibaiaren sorburura joatekotan ginela. Baina han ikusi beharreko ur-jauzi ederrak urik ez daukala jakinda, zalantza sortu zaigu: Nora joango gara egun horretan, NERBIOI ibaiaren sorburura ala GAZTELUGATXE aldera? Aurrenekoan zelai eta baso eder artean ibiltzeko aukera, bigarrenean kostaldea eta itsasoa...

Zer nahiago duzue zuek? Euskaltegiko ohar-taulan ere galdera bera bota dugu eta ekainaren 7a arte duzue han ala hemen erantzun eta zuen iritzia emateko.

Boga, boga...

A ze nolako arraunlariak euskaltegiko mintzalagunak eta hauekin batera etorri diren haurrak! Pratoi zailduaren eskutik hortxe joan dira haizea lagun faro pareraino (eta ez aurrerago, baezpare). Hantxe zebiltzan Libiakoak ere eman eta eman... haiek bai zuzen!!!

Baina, eskarmenturik gabekoak izateko, eta arraunek elkar jo duten aldiak ahaztuta, dena ederki atera da. Ez al da hala, Markos?

Loteria kontu txiki bat

Barnetegira joan direnek izango al dute zorterik ???
Gaur bertan jakingo dugu. Zarautzen soberan geratu ziren sosekin erositako zenbaki horiek esango digute.
Zorte on!

SUKALDE KONTUAK - IRITZIA II

Sukalde kontuak umorezko filme bat da eta 6 pertsonaia agertzen dira. Filme oso dibertigarria da. Ikasleekin joateko pelikula egokia da oso ondo ulertzen baita.
Istorio hau Donostiako Alde Zaharrean gertatzen da eta oso aktore ezagunak dira ETB1en eta ETB2an agertzen direlako. Hiru pertsonaia Bolibiakoak dira eta meritu handia daukate euskaraz hitz egiten dutelako.

Tereren arratsaldeko taldeko ikasleak

SUKALDE KONTUAK - IRITZIA I

Sukalde kontuak ikasleekin joateko aproposa da, arina eta dibertigarria baita, erraz ikusten da. Pertsonaia asko dira nagusi pelikula honetan eta Donostiako sukaldaritza eskola batean gertatzen da dena. Gauza asko jazotzen dira eta azken momentu arte mantentzen da trama. Guk oso gustora ikusi dugu eta gomendatzen dizuegu

Tereren arratsaldeko taldeko ikasleak

Egun batez mintzalagunak arraunlari

Pasaiako mintzalagun taldekoak datorren igandean arraunlari bihurtuko dira beste behin ere, eta Albaola untziolako lagunen begiradapean hortxe saiatuko dira badian barrena aurrena eta ur handixeagotan gero trainerua ez iraulitzen... Udal euskaltegiaren atarian geratuak dira goizeko 9:30ean, 10:00etarako Albaolakoen untziolan izateko. Goiz pasaren ondoren, ohitura onak ez galtzearren, hamaiketakoa.

Zatoz zu ere! (bideoan iazko saioa)

Barnetegitik bueltan...

Zarautzen, Getaria aldean, Zumaiako labarretan, Aiako lurretan, Pagoetan... batean eta bestean ibiltzeko parada izan dute asteburuko barnetegian izan diren geure euskaltegiko lagunek. Eguraldia ere aldeko, lagunarte on-onean euskaraz aritu omen dira jo eta su...

Argazkiek ondo asko erakusten dute non barrena ibili diren... bideoa ere hortxe geratuko da hamasei lagunek elkarrekin pasatako orduen lekuko... (Argazkiak eta bideoa bigarren erantzunean dituzue)

Goazen zinemara!

Aspalditxo ez dugu horrelakorik izan, baina AIZPEA GOENAGAk emango digu oraingoan aukera: "Sukalde kontuak" filma aurkeztu du gaur eta bihar, hilak 22, estreinatuko da zinemalekuetan. Aizpeak zuzentzen duen lehen film luzea dugu eta barre algarak sortuko omen dizkigu. Asteburuan barnetegira joateko moduan ez zareten guztiok, badakizue nora joan... Esango diguzue gero zer iruditu zaizuen.